जीर्ण व्याधींवर आयुर्वेदिक उपचार

जे आजार व्यक्तीच्या शरीरात खूप दिवसांपासून ठाण मांडून असतात त्यास जीर्ण व्याधी म्हणावे. हे आजार एकएकटे कधी राहत नाहीत. सोबत ते इतर आजारांना घेवून राहतात किंवा आजार वाढवत जातात व आपल्या शरीरातील इतर अवयवांमधे अनेक दोष निर्माण करतात. उदा आम्लपित्ताचा (Hyperacidity) त्रास असणाऱ्या व्यक्तीचे केस अधिक गळतात, लवकर पांढरे होतात. त्यांना विविध त्वचा विकार होऊ शकतात. लवकर चष्मा लागतो चष्म्याचा नंबर वाढू शकतो. हृदयविकार होऊ शकतो, व्हेरीकोज व्हेन्सचा त्रास होऊ शकतो, अल्सरचा त्रास होतो. संडासला आग होते, कधीकधी रक्त पडते त्यामुळे रूग्णास ‘आपल्याला मुळव्याधीचा त्रास आहे’ असे वाटू लागते परंतु मूळ आजार मात्र आम्लपित्त असतो. हे लक्षात न आल्याने रूग्ण गोंधळात पडतो व प्रत्येक वेगळया लक्षणासाठी त्याच्या वेगवेगळ्या डॉक्टरांकडे फेऱ्या सुरू होतात. परंतु मूळ आजारच बरा होत नसल्याने त्याला इतर लक्षणांसाठी अपेक्षित गुण येत नाही. त्यामुळे मग नैराश्य (Depression) यायला सुरूवात होते. स्वभावातील चीडचीड वाढते, अभ्यासात -व्यवसायात मन रमत नाही. आपल्या मागेच अशी अनेक आजारांची ‘ब्याद’ का लागली याचे उत्तर योग्य मार्गदर्शना अभावी रूग्णास सापडत नाही. यातूनच अनेक मनोशारिरीक विकार (Psychosomatic Disorders ) निर्माण होतात. ज्या कुटुंबात वरील प्रमाणे रूग्ण असेल त्या घरातील सर्वच व्यक्तींचे आरोग्य बिघडल्या सारखे होते. त्याला फरक पडावा म्हणून विविध प्रकारच्या तपासण्यांच्या चक्रात त्या रूग्णासोबत त्याचे संपूर्ण कुटुंब या डॉक्टरांकडून त्या डॉक्टरांकडे अशा फेऱ्या मारत रहाते. परंतु मूळ आजारच दुर्लक्षित राहील्याने रूग्णाचे आर्थिक, शारिरीक व मानसिक नुकसान मोठ्या प्रमाणात होत रहाते. म्हणूनच कोणत्याही जुन्या आजारांबाबत / लक्षणांबाबत तात्पुरत्या स्वरूपात पडणाऱ्या फरकावर समाधान न मानता तो आजार आपल्या शरीरातून कायम स्वरूपी निघून गेला पाहीजे या उद्देशानेच प्रत्येक व्यक्तीने प्रामाणिकपणे प्रयत्न केले पाहीजेत. तरच प्रत्येकजण खऱ्या अर्थाने शरिरीक व मानसिक पातळीवर परिपूर्ण आरोग्यदायी जीवन जगू शकेल.

आपल्या शरीरातील सर्व संस्थांमध्ये ( Systems) खालील जीर्ण व्याधी – जुने आजार आढळून येतात. या सर्व आजारांवर १९९८ पासून आम्ही आमच्या हॉस्पिटलमध्ये वमन, विरेचन, बस्ती, नस्य, रक्तमोक्षण इ. पंचकर्मांनी व विशेष संशोधित आयुर्वेदीक औषधांनी यशस्वी उपचार करीत आहोत. ‘आयुर्वेदीक औषधांनी उशीरा गुण येतो’ हा गैरसमज समाजात रूढ होता. वास्तविक योग्य निदान व उच्च दर्जाची उत्तम औषधे यामुळे रूग्णास दहा दिवसात लक्षणांमध्ये समाधानकारक बदल जाणवू लागतात.